Qulaqcıqlar və bizim eşitmə qabiliyyəti

İndi qulağında qulaqcıq olmayan yeniyetmə və gənclərə rast gəlməmək mümkünsüzdür. Hətta bəzən orta yaşlı insanlar da onların sırasına qoşulurlar. Gənclər müsiqini hər yerdə dinləyirlər: küçədə, nəqliyyatda, dərsdə, mağazada, evdə və i.a. Və bu musiqi pərəstişkarları ətrafdakıların diqqətini çox da cəlb etməmək üçün vakuum qulaqcıqları seçirlər, daha doğrusu qulaq dəliyinə çox rahatca və daha dərin oturulan qulaqcıqları. Belə qulaqcıqla musiqi dinləmək daha keyfiyyətlidir və ətrafdakı səs-küy musiqi sədalarına qarışmır. Ancaq çox az adam o barədə düşünür ki, sevimli musiqidən ayrılmamaq arzusu sonrakı qarşısıalınmaz fəsadlara – başgicələnməyə, qulaqda səsə, cingiltiyə və nəticədə eşitmə qabiliyyətinin azalmasına gətirib çıxara bilər. Həkimlər və alimlər belə bir kədərli nəticəyə gəlmişlər ki, "yüksək səsli musiqini qulaqcıq vasitəsilə daim və uzunmüddətli dinləmək qaçılmaz olaraq eşitmə qabiliyyətinin zəifləməsilə nəticələnir”. Söhbət o kəslərdən gedir ki, ardıcıl olaraq bir neçə il 80% səs yüksəsliyi ilə 90 dəqiqə ərzində günbəgün musiqi dinləyirlər. Qulaqcıqlar barədə bu narahatlıq öz təsdiqini artıq tapmışdır: həyəcanlı statistika gənclər arasında eşitmə zəifliyinin çox sürətlə artmasını təsdiq edir.

Ehtiyyət tədbirləri

            Heç kim sizi bu gündən başlayaraq sevimli musiqinizi dinləməkdən imtina etməyə çağırmır. Ancaq onun orqanizmə bəzi təsir mexanizmlərini bilməklə, bu prosesi nəzarətdə saxlamaq və onun neqativ təsirindən qorunmaq kifayətdir.

·        Sağlamlığını qorumaq istəyən şəxslərə mütəxəssislər məsləhət görürlər ki, taxma qulaqcıqlarda maksimal yüksək səslə uzun müddət musiqi dinləməsinlər. Əgər  musiqi dinləyən şəxs eyni zamanda yaxınlıqdakı adamın nitqini də eşidə bilirsə, belə səs tonu yolveriləndir.

·        Yaxşı olar ki, bütün qulaq seyvanını tam örtən və sağlamlığa təhlükəli yüksək səsə imkan yaratmayan qulaqcıqlardan istifadə olunsun.

·        Əgər 70 dB və daha artıq səs gücü daimi olaraq qulaqda yerləşən sensor hüceyrələrə təsir göstərərsə, onda insanda xroniki neyronsensor ağır eşitmə əmələ gəlir, buna başqa sözlə səs travması da deyirlər. Müqayisə üçün  nəzərinizə çatdıraq ki, müasir pleyerlər 110-120 dB güclü musiqi səsləndirə bilərlər. İnsan qulağı üçün təhlükəsiz səs səviyyəsi isə 25-30 dB-dir.